Myzejene Selmani

Myzejene Selmani ka lindur më 5 maj 1969, në Prishtinë. Mësimin fillor e kreu në shkollën Elena Gjika në Prishtinë, ndërsa shkollën e mesme në drejtimin matematiko-teknik gjithashtu në Prishtinë.

Studimet universitare i përfundoi në drejtimin e shkencave të energjetikës, ku më pas vazhdoi studimet master në të njëjtin drejtim në Universitetin e Prishtinës, si dhe një master në Ekonomi në Universitetin AAB. Myzejene Selmani është njëra nga themelueset e Aleanca Kosova e Re (AKR), e cila u themelua në vitin 2007. Në zgjedhjet e atij viti, ajo u zgjodh deputete, duke qenë pjesë e grupit të 14 deputetëve të kësaj partie.

Ajo ka pasur një rol të rëndësishëm në historinë më të re të Kosovës, duke qenë një nga 120 deputetët që nënshkruan Deklaratën e Pavarësisë më 17 shkurt 2008.

Në vitin 2010, tre vjet pas zgjedhjes së parë, Myzejene Selmani u zgjodh sërish deputete, duke fituar besimin dhe mbështetjen e votuesve të Kosovës për një mandat të dytë.

Gjatë karrierës së saj politike, Myzejene Selmani ka mbajtur disa pozita të rëndësishme, të cilat kanë kontribuar në zhvillimin e institucioneve të Kosovës. Disa nga pozitat kryesore që ajo ka udhëhequr janë: Anëtare e Bordit të Aviacionit Civil,

Zëvendësministre e Bujqësisë, Këshilltare politike, Kryesuese e Komisionit Parlamentar për Ekonomi, Tregti, Energjitikë dhe Transport, Shefe e Grupit Parlamentar të AKR-së, Anëtare e Komisionit Parlamentar për Liritë dhe të Drejtat e Njeriut.

Angazhimi dhe kontributi i saj në politikën kosovare janë dëshmi e përkushtimit të saj për zhvillimin e mëtejshëm të Republikës së Kosovës.

Myzejene Selmani është kandidate për deputete në listën e Koalicionit për Familjen.